abendua 2015

0

Labayru Fundazioak Galdakaoko Udalarentzat egin dauen bideoa aurkeztu barri da. Bertan, ‘Galdakao. Mozoiloa eta kukua’ izenburuagaz, hamabost minutuko bideoan hainbat jakingarri emoten dira ibilaldiak zeharkatzen dituan lekuei buruz. Bekea, Arteta, Lekue, Usansolo, Labeaga, Urgoiti auzuneak, batetik besterako tarteak eta lekuotako ondasunak eta ondareko edukiak labur eta egoki erakusten dira.

Honezkero Youtuben ikusgai dago helbide honetan: Galdakao. Mozoiloa eta kukua

0

Sabino Arana Fundazioak Leopoldo Zugazari izen bereko saria emongo deutso sarien XXVII. edizinoan, euskal kulturari egindako ekarpenagaitik. Leopoldok hainbat kultur erakunde sortzen parte hartu dau, besteak beste, Gerediaga Elkartea, Durango Liburu eta Disko Azoka, Durangoko Arte eta Historiako Museoa eta Zarauzko Photomuseuma.

Labayru Fundazioagaz, eta haren arduradunakaz, lotura estu-estua euki dau hasieratik bertatik. Berak argitaratu ditu Labayruren testu-liburuak hasiera-hasieratik, Derioko Udako Ikastaroetan hasita. Berak diseinatuak dira erakundeak ateraten dituen liburu-bildumak, gaur egun 500 aletik gorako fondoa osotzen dabenak. Beste horrenbeste esan behar da hiru aldizkariez; euretariko batek, gainera, Bizkaiko Foru Aldundiaren saria hartu eban diseinurik oneneko aldizkaria izatearren.

Bere bitartekaritzari esker Labayru Fundazioko Euskal Bibliotekak asko ugaritu ditu bere fondoak, bai emaitza bai liburu-erosketen bitartez.

Labayruren ordezkaria izan da Eusko Ikaskuntzan 20 urte baino gehiagoan. Labayruko Artezkaritzako presidentea izan da eta Ohorezko Laguntzailea da.

Zorionak!

0

Abenduaren 22an Bilboko Udalak Karmele Goñi Bilboko Ospetsu izendatu eban.

Karmelek gazte-gaztetatik erakutsi eban etnografiarako joerea. 1953an Jose Migel Barandiaran atzerritik itzuli zanean, Karmele haregaz hasi zan beharren Aranzadi Zientzia Elkarteko Etnologiako Seminarioan. Aldi berean hasi zan Barandiaranek sortutako Anuario de Eusko-Folklore aldizkarian lanak argitaratzen.

Etnografiaren ikerketarako Etniker Gipuzkoa taldeko kidea da, Etniker Euskalerria taldeen barruan. Bere ekarpenik handiena Zeraini buruz egindako azterketa eta euskal jantzien gainean egindako lanak dira.

Jose Maria Mugicagaz 1957an ezkondu zanetik Bilbon bizi da, eta bertan egin dau bide profesionala. Resurrección Mª de Azkue ikastola sortzen parte hartu eban; eta beste andra talde bategaz batera, aintzindaria izan zan katekesia euskeraz emoten Bilboko parrokietan.

Bizibidez etnografia izan dau lan-esparrua. Euskal Herrian Autonomia Estatutua onartu orduan Museo Etnografikoko zuzendari izandatu eben, gaur egun Euskal Museoa dana. Urtetan jardun izan dau hor beharren, bai materialak batzen, bai bildumak sortzen, bai museoa berrantolatzen.

Labayru Fundazioagaz senarraren bitartez izan eban lehenengo hartu-emona; izan be, Jose Maria Mugica Labayruren sortzailea izan zan eta Artezkaritzako presidentea hainbat urtetan. Labayru Fundazioak Ohorezko Laguntzaile izendatu eban Karmele erakundeari emondako laguntasunagaitik.

 

0

Abenduaren 21ean aurkeztu dau Jabier Kalzakortak tesia Jesus Antonio Cid, Adolfo Arejita eta Charles Bidegainek osotutako epaimahaiaren aurrean. Euskal baladen errepertorioa finkatu eta zabaldu gura izan dau eta zeregin horretan emon ditu bere lan-urteetako ordurik gehienak. Corpus handia be handia biribildu dau. Jesus Antonio Cid epaimahaiburuak esan deutsan moduan, bere lanaren aurrekoa eta ondorengoaz berba egin beharko da aurrerantzean.

Berrogeta zazpi kapitulu, mila eta bostehun orritik gora ondu ditu. Baina ekarpenik handiena da balada-gai bakotxeko berak aurkitu dituan aldaerak, bai kopuruaren aldetik bai berezitasunen aldetik.

Memoria apartekoa dauka Kalzakortak, eta horreri esker, aldaeren arteko loturak egiteko gaitasun berezia dauka.

Lan zoragarria egin dau, gerorako derrigorrez kontuan hartu beharrekoa.

Zorionak!

0

Aurten, bigarrenez, ibilbide bat erakutsiz bideo bat egin dau Labayru Fundazioak Galdakaoko Udalarentzat. Oraingoa Bekea, Arteta, Lekue, Usansolo, Labeaga eta Urgoiti auzo eta auzuneak erakusten dira. Bideoak erakusten dauen bidea egiteko deia egin dabe Udaletik abenduaren 20rako. Taldetxu batek bidea egin eta gero, bideoan agertzen diran lekukoei eskertu egin deutsie parte hartu izana. Aurkezpenean hainbat jente batu da.

Bideoaren helburua lekuotako ondarea erakustea da: ermitak, jaiak, ospakizunak, lanbideak, lekuen izenak, soloak, lurragaz eta abereakaz lotutako beharrak, ohiturak eta siniskerak… zer ez!

Bideoa sarean ikusi ahal izango da laster, bai Udalaren bitartez bai Labayru Fundazioaren Youtubeko kanalean.

Lan hau, aurretik Elexalde auzoari buruz egindakoaren moduan, Zuztarretatik ahora egitasmoaren barruan sartzen da.

0

2015ean Labayru Fundazioak hainbat lan egin dau Bizkaiko udalentzat herriko ondarea zabaltzeko. Horreen artean, bideo baten bitartez ibilbide bat erakustea izan da arrakastatsuenetakoa. ETBko Azpimarra saioan lan horren barri emoten egon dira Akaitze Kamiruaga, Labayruko Ondare atalaren arduraduna, eta Miren Atutxa, Galdakaoko Udaleko euskera teknikaria eta Nerbioi-Ibaizabal aldeko herrien arteko koordinatzailea.

Hemen bideoa osorik: Akaitze Kamiruaga eta Miren Atutxa ETBko Azpimarra saioan

 

0

Abenduaren 5ean, Bakioko Txakolingunean herriko liburutegiak eratutako liburu-azokan, Iratxe Ormatza Imatzek parte hartu dau. Iratxek Idatz & Mintz aldizkarian kolaboratzen dau eta hainbat aletan argitaratu ditu narrazinoak. Horrezaz ganera, Urbegi bilduman Hegoak bidaia-liburua argitaratu eban 2008an Labayru Fundazioan. Horreek lanok erakusten parte hartu dau herriko liburu-azokan Iratxek.

Beragaz batera beste herritar batzuk egon dira; kasurako, korukoak euren diskoak eskaintzen, argazkilariak beren lanak erakusten, Alaitasuna pelota taldekoak 25. urteurreneko aldizkariagaz… Liburutegiak liburu trukea egiteko aukera emon eutsien hara hurreratutakoei; izan be, hainbat familia eta herritar inguratu ziran.

0

Abenduaren 5ean Noticias Taldeak eta Deia egunkariak omenaldia egin eutsien Ander Manterolari eta Labayru Fundazioari. Hori dala-ta, Ortzadar gehigarri berezia eta monografikoa argitaratu eben. Hona gehigarria.

Ortzadar05122015

0

Deia egunkariak artikulu baten jaso dau Laukizen abenduaren hasieran egindako Laukiz bizimodua eta ohiturak liburuaren aurkezpena.

Deiako artikulua

 

0

Abenduaren 3an Euskeraren Nazioarteko Eguna dala ospatzeko, 4an ekitaldi berezia eratu dabe Meñakan: Jabier Kalzakortaren argibideak ahozko koplei buruz, koplak eurak entzun eta abesteagaz batera. Horretarako lagun euki ditu Iker Gangoiti eta Xabier Butron trikitiakaz.

Karmele Berriozabalen aurkezpenaren ostean, pieza pare bat jo eta abestu eta Kalzakortak dantza-koplak zer diran azaldu eban. Erromeri-koplak noiz eta zelan kantatzen diran kontuan hartuta, gazteen arteko giroagaz zerikusia daukan mamina erakusten dabe, ironikoa eta sarkastikoa sarritan.

Kopla batzuk danen artean abestuta, Jabierrek batzuk sakonago azaldu edo garandu zituan.

Kopau bategaz amaitu zan ekitaldia jentetsua.