maiatza 2018
Labayru Fundazioaren proiektuetariko bat, aurten, Gatikako Udalarentzako baserrien katalogoa sortzea izango da. Horretarako, hasteko, hainbat datu-base hustu doguz; besteak beste, Fogueraciones de Bizkaia del siglo XVIII liburua eta Bizkaiko Foru Agiritegi Historikoko 1825-1830ko Polizien Erroldak eta Archivo Municipal de Gatika. Horreen hustuketeari Udalaren zerrendea eta Eusko Jaurlaritzak daukan datu-basea gehitu jakoz.
Momentu honetan, jasotako informazinoa lekukoakaz kontrastetan gabilz. Grabazinoen bidez lekukoek baserriak izentetako ahoz erabilten dabezan formak lortuko doguz, sarritan idatzizkotik asko aldentzen direnak. Informanteei batutakoa be lagungarria izango da katalogoa osotzeko.
Argitalpenean, baserriei buruzko informazinoaz gainera, bakotxaren argazkia gehituko da.
Jabier Kalzakortak Euskal baladak: azterketa eta edizio kritikoa lana aurkeztu dau. Unibersidaderako egindako tesi-lana da berez, eta hor batu ditu orain arte ezagutzen diran balada eta balada-zati guztiak. Bere helburua jatorriko iturrietara jo eta testuak zehatz eta manipulau barik emotea izan da.
Antonio Zavala zanaren lorratzetik, 75 balada-gai landu ditu. Bere ekarpenik handienetakoa da ezezagun ziran aldaerak gehitzea beste biltzaile batzuek egindako bildumetara. Etxe, kamara, korta, liburutegi, biltegi eta era guztietako gordelekuetan ibili da Euskal Herri osoan holangoen bila, eta bai topau be harribitxi zoragarriak. Berak esan dauen moduan, makinatxu bat pausu egin ditu ezer topau barik, baina kanturen bat aurkitu orduan, orduan bai poza.
Ahoz lehenago kantatzen ziran, eta orain dala 30-40 urte batzen ziran baladak hondino. Gaur egun guztiz aldenduta dagoz memoriatik, kantari ezagunen bitartez ezagutzen ditugunak izan ezik.
Aurrerantzean erreferentziako lana izango da hau, euskal herri-literatura ezagutu edo landu gura dauen edozeinentzat.
Labayru Fundazioak argitaratu ditu liburukiok, BBK Fundazioaren eta Markinako Udalaren laguntzaz.
Euskalduna jauregian euskerearen erabilerarako normalizazino-plana egiteko ardurea hartu barri dogu. Lanak atal bi ditu. Alde batetik, euskerearen erabileraren ikuspegitik, egoeraren diagnostikoa egin behar da; hau da, bai barrura begira bai kanpora begira, zer egiten dan euskeraz eta zer falta dan egiteko. Horrek hainbat arlo hartzen ditu: beharginek emoten dabezan zerbitzu zuzenak, inprimakiak, hizkuntza-paisaia, eta abar.
Beste aldetik, hobetu beharreko hori zuzentzen joateko jarduera-plana egin behar da, lau urteko epeari begira; hau da, 2018-2022ko Euskara Plana. Plan horretan lan-ildoak finkatuko dira, eragin-esparruak ezarri eta bakotxean lortu beharreko helburuak zehaztu. Eta era berean, 2018an bertan egingo diren jardueren Ekintza plana diseinatu behar da.
Honezkero gure teknikari bat beharren hasita dago bertan.
Daborduko martxan da hizkuntza-eskakizunak egiaztatzeko 2018ko lehenengo deialdiko prozesua, eta Labayrun be makina bat ikasle dabilz zeregin horretan.
Batzuk beharragaitik eta beste batzuk zaletasunagaitik ikasturte guztia egin dabe gurean euskera ikasten. Orain, azken hileotan ikasitakoa erakusteko momentua heldu da.
Joan dan astean egin dabez lehenengo azterketak; eta garagarrilera bitartean, ikasleak jo eta ke ibiliko dira euren helburua lortzeko ahaleginean.
Bilbo-Abando
Colon de Larreategi, 14 – 2. esk.48001 Bilbo (Bizkaia)
Tel.: +34 94 443 76 84
labayru@labayru.eus
Derio
Larrauri, 1A - 5.a48160 Derio (Bizkaia)
Tel.: +34 94 406 01 71
idazkaritza@labayru.eus
Bilbo-Bolueta
Metroalde eraikinaBilbo-Galdakao errep., 6A
48004 Bilbo (Bizkaia)
Tel.: +34 94 607 72 10
labayru@labayru.eus
