azaroa 2019
Nikolas Alzola Bitaño Izurtzako idazlearen Kantuz eta itxaropenez izeneko liburua aurkeztu dabe Izurtzan azaroaren 27an. Iaz narrazioen bilduma egin zan moduan, aurten Bitañoren olerki hautuakaz osotu dau liburua lan-talde berak. Antton Mari Aldekoa-Otalora, Xabier Boveda, Alberto Errazti eta Sebas Gartzia Trujillo dira edizinoaren atontzaileak, eta Labayru Fundazioa argitaratzailea. Testuakaz batera, ganera, egileak berak egindako marrazkiak argitaratu dabez, edizino txukun-txukunean.
Aurkezpenean hainbat jentek parte hartu eban: Udalaren izenean Lorea Muñoz alkateak, Labayruren izenean Adolfo Arejita zuzendariak, lasalletarren izenean Martin Lasak, Iurretako koruak Antton Marik zuzenduta, eta poemak irakurten beste hainbatek, Gerediaga alkartetik, Bitañoren familiakoak, Labayru Fundaziotik eta egileak eurak. Bingen Zupiria Kultura eta Hizkuntza Politikako sailburua be etorri zanez, egileen laguna dan aldetik, aurkezleak berba egiteko bidea emon eta parte hartu eban.
Ekitaldi ederra izan zan, herritarrak, lagunak eta senideak alkartuta. Liburua bera, irakurgai labur-errezez osotuta dago, testu atsegin eta bihozkorrakaz.
Joan dan azaroaren 27an batzartu Bilboko Udaleko Euskeraren Aholku Batzordea, agintaldi barriko lehenengo batzarra egin dabe. Ordezkarien artean, Labayru Fundazioaren izenean Jokin Gorozika Artezkaritzako presidentea partaide da.
Batzar horretan euskerearen erabilera normalizatzeko plana aurkeztu dabe. Helburu bikotxa jarri dabe etorkizunera begira: hizkuntza ofizial bietan zerbitzua emotea, bereizketarik egin barik; eta herritarren hizkuntza-eskubideak bermatzea. Euskerea zerbitzu-hizkuntza ezeze lan-hizkuntza be izateko helburua hartu dabe.
Azaroaren 26an Elorrioko toponimiaren gaineko berbaldia emon dau Asier Bidart Labayrukideak. Elorrioko Udalak bertako ondarea erdal hiztunei ezagutzera emoteko zikloa antolatu dau aurten, Bizkaiko Foru Aldundiaren Ondareari buruzko Europako Jardunaldien babespean. Guztira bost hitzaldi aurreikusi dabez eta Elorrioko baserriak, kurutzeak, kofradiak, toponimia eta lorategiak izango dira berbagai nagusiak.
Zikloaren hirugarren hitzaldia izan da eta bertan 2003-2006 urte bitartean Labayru Fundazioak, Elorrioko Udalaren eskariz, egindako ikerketaren eta gizarteratzearen barri emon da, bai eta bertako toponimiaren ezaugarri eta bereizgarriei buruzko informazinoa be. Berbaldian udalerriko berein errealidade geografiko bertako toponimiagaz buztartu da; uria eta auzoak, olak eta errotak, haizeolak, auzobasoak, kortak eta neberak, besteak beste.
Aurtengo zikloaren laugarren berbaldia abenduaren 3an izango da, Elorrioko lorategien gainekoa, eta zikloaren bosgarren eta azkena, abenduaren 17an, Elorrioko baserrien arkitekturaz.
Sabino Arana Fundazioak eta Bilbao 700 Fundazioak alkar hartuta, “Euskal literatura eta memoria” izeneko jardunaldia eratu dabe azaroaren 20an Bilbon. Erakunde biok memoriaren ganean eratuten daben hirugarren saioa da.
Igone Etxebarria Labayru Fundaziokoa ibili da eratzen laguntzen, eta jardunaldian bertan aurkezle edo moderadore. (gehiago…)
Bilbo-Abando
Colon de Larreategi, 14 – 2. esk.48001 Bilbo (Bizkaia)
Tel.: +34 94 443 76 84
labayru@labayru.eus
Derio
Larrauri, 1A - 5.a48160 Derio (Bizkaia)
Tel.: +34 94 406 01 71
idazkaritza@labayru.eus
Bilbo-Bolueta
Metroalde eraikinaBilbo-Galdakao errep., 6A
48004 Bilbo (Bizkaia)
Tel.: +34 94 607 72 10
labayru@labayru.eus
