Labayru Gaur

Bilbon hara-hona. Leku-izenak eta euren arrastoak izeneko liburuak Bilboren barri emoten dau, baina toponimia gidari dala. Hau da, Bilboko hainbat leku-izenen bitartez, lekuon ganeko hainbat informazino emoten da.

Lan korala da, 40 artikulu ditu, hainbat idazlek onduta. Ikuspegia ezbardina da batetik bestera: historikoa, linguistikoa, anekdotatan oinarritua… Danak oso interesgarriak eta jakingarriak.

Toponimia leku-izenak aztertzen dituan disziplina da, eta oso lagungarria da lekuotako bizimoduaren barri emoteko. Geografia, orografia, lanbideak, persona ilustreak… hainbat jakingarri adierazten dabez.

Horreek izan dira liburu hau onduteko gidak. Uribarri, Artxanda, Abusu, Areatza, Begoña, Zazpikaleak, zubiak, zinemak, txokolatea, koplak… Bilbogaz lotutako hainbat gai jorratu dira, erraz-erraz leiduteko.

Egileen artean be hainbaten kolaborazinoak dagoz: Josu Bijueska, Jabier Kalzakorta, Segundo Oar-Arteta, Pedro Zuberogoitia, Zuriñe Goitia, Jaione Bilbao, Xabi Paya, Asier Bidart, Juanjo Hidalgo, Felix Mugurutza, Adolfo Arejita, Mari Jose Villa, Ziortza Artabe eta Jon Onaindia.

Idatzi arinak dira, soltean leituko modukoak, eta gure inguruaz eta kulturaz asko ikasteko modua emoten dabenak.