Labayru Gaur

Labayru Fundazioak Labayru Gramatika argitaratu dau bizkaierari buruz. Urteetako ikerketa eta lanaren emaitza da orain sarean aurkezten dana edonorentzat eskuragarri. Bertan, bizkaieraren ezaugarri morfologiko, sintaktiko eta ortotipografikoak batzen dira, bizkaiera hobeto ezagutu eta erabili ahal izateko, prestigioa emoteaz gainera.

Gramatikako edukiok era askotakoak dira, tartean, deklinabidea, aditza, graduatzaileak, postposizioak, perpaus motak… Lehendik be badagoz beste gramatika batzuk, baina norentzat da lagungarria Labayruren gramatika?

Berez euskera darabilen edo euskeraz idatzi gura dauen edonorentzat. Bizkaitarrok batzuetan zalantza daukagu: hau batuaz ondo esanda dago? Eta bizkaieraz idatzi gura badot zelan dago hobeto? Bizkaieraz jarduteko orduan sortu leitekezan zalantzak argitzeko tokia da gramatika hau. Era berean, bizkaieraz desbardinak diran egituretan, bizkaieraren eta batuaren arteko aldeak zeintzuk diran azaldu da.

Lan honen asmoa testua sortzeko eredu eta baliabideak eskaintzea izan da, idatzizko iturririk esanguratsuenak eta gaur egungo hiztun jatorrek darabilezan egiturak kontuan hartuta. Idatzizko iturriei besteko lekua emon jako ahozkoari.

Gramatika honek mendebaldeko euskera edo bizkaiera estandarra deritzoguna finkatzen dau, beti be euskera batuagaz lokarriak ugariagoak eta estuagoak izan daitezan.

Gramatikako kontzeptuen deskribapen edo azalpenakaz batera, adibideak jarri dira beti, egitura bakotxa bere erabilera-testuinguruan kokatzeko. Gainera artikulu bakotxean oharrak, proposamenak, galderak… egiteko aukera dago.

Hasierako orrian azalpen edo ohar labur batzuk dagoz, barruan dagoanaren aurrerapen moduan. Gehienetan zalantza eragiten daben gaiak dira. Halakoak aldian-aldian argitaratuko dira, eta bertan ugaritu.

Lan honen oinarria aspaldian liburu moduan argitaratutako Euskeraren Jarraibide Liburua: Lehenengo pausuak (2001) eta Bizkai Euskeraren Jarraibide Liburua: Bigarren pausuak (2005) dira. Harrezkero lanean jarraitu izan dogu, eta orduko edukiak ugarituta dagoz.

Egitasmoa Eusko Jaurlaritzaren eta Bizkaiko Foru Aldundiaren laguntzarekin egin da.