Kategoria: Ekitaldiak

0

Labayru Fundazioak aurten beteten dituen berrogei urteak direla-ta, ekitaldi batzuk eratu ditu.

Barrura begira, erakundearen sortzaileak eta Ohorezko laguntzaileak omendu ditu.

Kanpora begira, horren barri emoteko artikulua argitaratu dau Adolfo Arejita zuzendariak Deia egunkarian: ikusi artikulua.

Eta amaitzeko, hilaren 30ean mahai-ingurua egingo da Rekalde aretoan. Gaia: “Geureak eta inorenak. Kultura, identidadea eta transmisinoa”. Hizlariak: Gaizka Aranguren, Agurtzane Intxaurraga, Ane Ortega, Xabier Paya. Moderadorea: Akaitze Kamiruaga.

 

0

Berrogei urteko ibilbidean persona asko igaro dira Labayrutik, beharren dala, laguntzaile dala, egitasmoren baten parte hartzen dala, erakundeen izenean dala… Era askotako ekitaldi eta ekintza gertatu izan dira eta horreen guztion irudiek osotzen dabe gure historia.

Dana batzea ezinezkoa bada be, argazki bilduma honetan laburpen erakusgarria dago.

Ikusi argazkiak.

0

Urteurrenaren harira, Labayruren sortzaileak omendu dira urteko Batzar Nagusian. Hasiera-hasierakoen artean, gure artean izan dira, Juan Mari Uriarte Goirizelaia gotzaina, Vicente Larrea Gayarre eskultorea eta Mitxel Unzueta Uzcanga (azken orduan etorri ezina).

Horreekaz batera Ohorezko laguntzaile izendatu dira sortzaile izandakoen artean Jon Arrieta Mardaras, Juan Beitia Gorriaran, Txomin Bereziartu Aranguren eta Ignacio Uribarri Jauregizar.

Eta lehendik Ohorezko laguntzaile izendatuta egon direnak be omendu dira: Ander Manterola Aldekoa, Gurutzi Arregi Azpeitia, Rafael Barbier Iturmendi, Claudio Barroeta Amorrortu, Jose Ignacio Berroeta Echevarria, Pedro Miguel Etxenike Landiribar, Karmele Goñi Auzmendi, Javier Ortega Uribe-Echevarria eta Leopoldo Zugaza Fernández.

Labayruren orain arteko ibilbidean behargin modura egindako lana saritzeko, Mª Luisa Romarate eta Edurne Romarate be omendu dira.

0
Gabin Azaola, Adolfo Arejita, Juan Mari Uriarte, Jokin Gorozika, Igone Etxebarria.

Martiaren 27an egin dau Labayru Fundazioak laguntzaileen urteko batzarra. Mahaiburu Juan Mari Uriarte gotzaina eta Labayruren sortzaileetako bat egon da. Haregaz batera, Jokin Gorozika Artezkaritzaburua, Adolfo Arejita zuzendaria, Gabin Azaola diruzaina eta Igone Etxebarria idazkaria. (gehiago…)

0

Ander Manterola Begoñazpi ikastolan egon da otsailaren 23an, Batxillerreko 1 eta 2. mailako ikasleakaz. Joan dan urtean Ikastoleak Gazte Role Model saria emon eutsan Anderri, bizitza osoko ibilbidea saritzeko. Hori dala-ta, orain bere esperientziaren barri emon deutsie ikasleei.

Topaketa horretan Anderrek Labayruri buruz eta euskerari buruz egin dau berba ikasleakaz. Izan be, hitzaldia baino gehiago alkarrizketa egin dabe, ikasleen kezkak, galderak eta jakingurako gaiak erabili dabez eta.

Saioa txanda bitan egin da, eta guztiz interesgarria eta atsegina izan da.

0

Aurten Galdakaoko Udalarentzat liburuxka bi egin ditugu, aurretik egindako bideo banatan oinarrituta. Bakotxean herritik egiteko ibilbide bat erakusten da: Elexalde ingurutik bata, Bekea-Arteta-Usansolo inguruetatik bestea.

Abenduaren 17an, herriko liburu-azokako egitarauaren barruan, liburuxka bien aurkezpena egin eban Igone Etxebarriak. Zuztarretatik ahora egitasmo orokorrean, urtero-urtero ekintzaren bat egiten da, eta aurten argitalpen bi horreek izan dira egitasmorako ekarpena.

Liburuxka bakotxean ibilbide bat erakusten da: mapa, jakingarriak, argazkiak, informazino orokorra… Edozeinek herria ezagutu ahal izan dagian eta baita be ibilbidea egin ahal izateko.

Errupin Jauregi zinegotziak eskerrak emon eta bertaratutakoei banatu egin eutsezan.

0

Jabier Kalzakortak liburua aurkeztu dau abenduaren 15ean Bilbon, Foru Liburutegian. Liburuan Lea-Artibaiko herri ipuinen antologia bat egin dau ‘Bizkaiko kondairak’ bildumaren barruan.

Bera markinarra izanik, Lea-Artibaiko tradizinoaren iturririk esanguratsuenetara jo dau corpusa osotzeko. Markina, Lekeitio, Ondarroa eta Aulestiko ipuinak aukeratu ditu, han eta hemen lehenago argitaratutakoen artean.

Bilduma berean argitaratu izan dira Bilboko, Gorbeiako eta Durangaldeko ipuinak. Seve Calleja koordinadorea dala, Bizkaiko eskualdeetako ahozko tradizinoaren barri emota dau helburu.

Argitalpena euskeraz eta erderaz egin da, liburu berean edizino biak dagozala.

0

Bosgarren urtez eratu da Bilbon ‘Berbagunea’, Bilbo euskaldunari agiriko lekua emoteko. Aurrekoetan moduan Labayruko ikasle talde batek parte hartu dau Alondegiko ekitaldian. Jarduera horren helburua da euskaldunak alkartzea eta euskeraz jardutea hainbat orduz jarraian.

Euskaldun onak eta ikasten dabizenak, gazteak eta adinekoak, gizarte arlo guztietakoak alkartu dira aurten be Bilbo erdi-erdian. Taldeka-taldeka hainbat alkarrizketa egin dabez euskeraz, gai guztiei buruz. Izan be, euskereak bizitzako arlo guztiak adierazteko balio dau. Euskerea jakitetik erabiltera jauzi egiteko aukera ezin hobea.

0

Arratzun urtean zehar herriko hamaika lagunen testigantzak batu ditugu, eurei alkarrizketak egin eta bideoan grabauta. Berbagaiak bizimoduko gorabehera guztiak: herria, auzoak, ermitak eta errotak, erreka-basoak, baserriak, bizimodua, lanbideak, jatekoak, jaztekoak, eskola, olgetak, gaztezaroko ibilerak, jaiotza-heriotzakoak, jaiak eta ospakizunak, gerra denporakoak…

Aurtengo egitekoa grabazinoak eurak egitea izan da, informazinoa batzea, gerora horren zabalkundea era batera edo bestera egiteko. Ha ta guzti be, batutako horren erakusgarri bat herrian aurkeztu zan abenduaren 3an. Aretoa bete egin zan herriaren deiari erantzunez eta bideoak harrera oso ona euki eban. Ikusi hemen.

Ostean lekukoei oparitxu bana emon, argazkia egin eta kopau baten inguruan beste hainbat eta hainbat kontu agertu ziran. Alkateak datorren urtean egitasmoari jarraipena emoteko borondatea agertu eban; halan da ze, datorren urtera arte!

0
Ezkerretik hasita, Juan Jose Etxeberria, Ander Manterola, Jabier Lezaun, Jose Antonio Garrido eta Cristina Zabala.

Abenduaren 2an Zestoako bainuetxean Paco Garmendia zana gogoratu eben, heriotzaren urteurrenean. Cristina Zabala, Deustuko Unibersidadeko Soziologiako dekano ordea gidari dala,  bost hizlarik parte hartu eben ekitaldian, Ander Manterola tartean dala (gehiago…)