Labayru Gaur

Labayru Fundazioan aparteko garrantzia emon izan deutsagu beti toponimiari, eta horren adibide da orain urte batzuk sortu genduan baserrien katalogoen bildumea. Dagoeneko sei ale argitaratuta dagoz Bizkaiko herri desbardinetakoak, eta bidean dira beste bi, Deriokoa eta Lemoizkoa.

Gure ohiko metodologia hauxe da: lehenengo eta behin artxiboetako hustuketa egin behar izaten da. Baserri bakotxari argazkia atera, eta gero informazino hori herri bakotxeko lekukoakaz kontrastau, zuzenean eurekaz batzartuta; era horretara aldaerak, izen desbardinak, eta etnografia edukiak zehazteko, besteak beste.

Hurrengo baserri bakotxaren fitxa laburra idazten da. Bertan jasoten dira, toponimoaren izen jasoa, ahozko aldaerak, datu nabarmenenak eta deskribapena.

Bizimodu tradizionalaren aldaketeagaz batera, gure baserriak be asko aldatu dira azkenaldi honetan, eta euren izenak eta jakingarriak batzea sano garrantzitsua da transmisinoa bideratzeko. Izan be toponimo horreek eta euren gaineko informazinoa gure kultura ondarearen parte dira.