Labayru Gaur

Joan dan martiaren 28an, Euskaltzaindiaren egoitzan, Liturgiako testuak euskeratzen ibilitako taldeari aitortza egin eutsien Eleizbarrutietako ordezkariek eta Euskaltzaindiak berak, azken honek erakundearen mendeurrenaren harira.

Hainbat herri-agintari bertaratu ziran: Mario Iceta Bilboko Gotzaina, Bingen Zupiria Eusko Jaurlaritzako Kultura eta HPSko sailburua, Lorea Bilbao Bizkaiko Foru Aldundiko Euskera eta Kultura diputadua, Ana Otadui Bizkaiko Batzar Nagusietako burua, Bilboko Udaleko ordezkariak, Eleizbarruti guztietakoak. Areto bete lagun batu ziran guztira, itzultzaileak eurak eta, hildakoen kasuan, senide eta ondorengoak. Eguzki-lore bana emon eutsien.

Bilboko Eleizbarrutiko kultur-jardueraren ganeko bideoa emon eben bertan, Bizkaian eleizea euskerearen alde izenburuagaz.

Vatikano II.a Kontzilioan erabagi zanean eleiz-irakaspenak lekuan lekuko hizkuntzan emotea, euskerea erabilten dan Eleizbarrutietako ordezkarien artean lan-taldea eratu eben alkarregaz testu bateratuak euskeratzeko. Talde-lana egin dabe beti, euskaltzale puntarengoak taldean dirala. Batzuk aitatzearren, Manuel Lekuona, Lino Akesolo, Mikel Zarate, Karmelo Etxenagusia, Emile Larre, Juan Mari Lekuona…

Lanari jagokonez, ez eben lan makala hartu: euskerea batu barik egoan arren, testu bateratua egin eben. Liturgiako testuetara lotuta, baina hizkuntza bizi baten bitartez landu ebezan testuok. Eta aldi berean, irakurtekoak barik entzutekoak dirala kontuan hartuta.