Labayru Gaur

Joan dan barikuan, otsailaren 20an, aurkeztu zan kultur-etxeko areto nagusian Labayru Fundazioak egindako Urduliz gure zuztarren iturri izeneko ikus-entzunezkoa. Bertan alkartu ziran hainbat urduliztar euren herriaren barri jakiteko gogoz.

Ekitaldia Itziar Iratzagorria alkateak aurkeztu eban, eta beragaz batera izan ziran Koldo Somokueto historialaria eta Akaitze Kamiruaga, Labayru Fundazioaren izenean.

Ikus-entzunezkoak hogeta sei minutuko iraupena dauka, eta bertan azaltzen dan ibilbidean, ondare immaterialagaz batera, beste era bateko ondareari buruz be hitz egiten da: historikoa, naturala, arkitektonikoa… Arlo bakotxeko adituek emon dabez azalpenak guztien artean lan biribila eginez. Honeexek dira parte hartu dabenak: Arantza Aldeazabal botanikan doktorea; Sergio Vega, Edestiarre Arkeologia Elkartekoa; Koldo Somokueto historialari urduliztarra; Mari Tere Garitaonandia lekukoa, eta Akaitze Kamiruaga, kasu honetan Gotzon Garitaonandiari buruzko azalpenak emoteko.

Ikus-entzunezkoa Labayru Fundazioaren Youtubeko kanalean dago ikusgai: