Labayru Gaur

Joan dan urriaren 11an, Zornotzako udaletxean, prentsaurrekoan aurkeztu genduan Bizkargiko Egunari buruzko dokumentala, Europako Ondarearen Jardunaldietan erakutsiko dana. Bertan parte hartu eben Ainhoa Salterain alkateak, Jon Artabe euskerako zinegotziak, eta Labayru Fundaziotik, Igone Etxebarria zuzendariak, eta Ziortza Artabe egitasmoa landu dauen teknikariak.

Hilaren 26an, iluntzeko 8retan, dokumentala ikusteko aukera egongo da Zornotza Aretoan, eta ostean, bertako lekuko batzuen parte hartzeagaz, eztabaida edo alkarrizketa egongo da. Joan gura dauenak libre dauka sarrerea, baina Aretoko webgunean hartu beharko dau konbitea.

Hona aurrerapena:

Aurtengo Jardunaldien gaia ondare immateriala da, arlo zabala berez. Baina zer da ondare immateriala? Komunidade batek konpartitzen dituan jakintzak, jarduerak, ezaugarriak, adierazpenak. Horreek danok belaunaldiz belaunaldi transmititzen dira, eta identidadeagaz lotuta dagoz, komunidadearen kohesinoa eragiten dabe, halakoen bitartez komunidade horretako kideak bertakotzat sentitzen diralako. Dantzak, ospakizunak izan leitekez ondare mota hori, baina baita be etxean biziteko modu bat, edo soloa lantzeko eta ganadua hazteko modua; ogibideak eta eskulanak. Osagai ezbardinak hartzen ditu kontuan.

Bizkargira etorrita, mendi bat da, lau udalerriren lurrak dituena: Amorebieta-Etxano, Muxika, Larrabetzu eta Morga. Maitzaren 3an Santa Kurtze ospatzen da bertako ermitan, eta hango bedeinkazinoak garrantzitsuak izan dira baserritarrrentzat, uzta ona eukiteko. Siniskerakaz lotuta, letaniak egiten ziran lehen, eta sikatearen kontrako errogatibak.

Erromeria lekua be bada, hartu-emonak egiteko lekua, jaia eta ospakizuna batuta. Baina gerran borroka latzak gertatu ziran han, eta memoriarako tokia be bada.

Hori dana da gure ondare immateriala, ezagutu beharrekoa, jagon eta hurrengo belaunaldiei erakusteko.