Labayru Gaur

Urtebeteko lanaren ostean, gaur goizean Geu be bagara itsasoa egitasmoa aurkeztu dogu Bilboko Itsas Museoko auditoriumean. Bertan izan dira Bingen Zupiria, Eusko Jaurlaritzako Kultura eta Hizkuntza Politikarako sailburua; eta Labayru Fundazioaren izenean, Igone Etxebarria zuzendaria, eta Akaitze Kamiruaga, lanaren egilea.

Egitasmoan parte hartu daben Bizkaiko kostaldeko barriemoileetako batzuk be bertan egon dira, pozarren gainera; azken baten eurak diralako lan honetako arima eta ardatza. Euren testigantza biziak izan dira libururako zein bideoetarako informazino-iturri nagusia; eta eurei esker garatu ahal izan dogu itsasoko emakumeen lanaren garrantzia erakutsi gura dauen ikerketea.

Ekitaldia familia-argazkiagaz hasi da, eta aurkezpen bideo labur bat ikusi eta gero, etorri dira Igone, Akaitze eta Bingenen berbak. Amaieran, lekuko guztien izenean, Guruzne Badiolak (Ondarroako train-konpontzaileak) be hartu dau hitza eta egindako lana eskertu eta era honetako ikerketen garrantzia nabarmendu dau.

Proiektu honen egilea Labayru Fundazioa izan da eta berak hartu dau egitasmo osoaren ardurea. Ikerketak Eusko Jaurlaritzaren Kultura Saileko Ondare Zuzendaritzako diru-laguntza izan dau.