Labayru Gaur

Durangoko Arte eta Historia Museoan inguruko andrei buruzko erakusketa zabalduko da martiaren 1ean. Erakusketa horretan Maitane Azurmendik egindako erretratuak egongo dira ikusgai. Erretratuon bitartez eskualdeko andren barri zabaldu gura da, azalera ekarri hareek egindakoa.

Lan horren azpian Durangoko Wikiemakumeok taldeak egindako behar isila eta ekina dago. Talde horretako kideak behar itzela egiten dabe ezkutuan dagozan andren ekarpenak gogoratzeko. Horretarako, Wikipedian andra bakotxari buruzko artikulua egiten dabe, entziklopedia horretan gizonen eta andren arteko oreka lortu guran. Biografia horreek hartu ditu oinarritzat Maitane Azurmendik erretratuok egiteko.

Tartean da Gurutzi Arregi, Labayru Fundazioko zuzendariorde izandakoa hainbeste urtean. Gurutzik lan itzela egin eban Bizkaiko ermita guztien katalogoa osotzeko, joan dan mendearen 80ko hamarkadan hiru liburukitan argitaratu zana. Ermiten tipologia eta euron inguruko gainerako ondarea erabili eban tesirako gaitzat be.

Gurutzi andra langilea izan zan, gizarteko esparru askotan konpromiso handia hartutakoa. Labayrun ezeze, Etniker, Eusko Ikaskuntza, Gerediaga, Durangoko Arte eta Historia Museoa eta beste erakunde batzuetan be fin ibili zan.

Erakusketa martiaren 1ean zabalduko da.