Labayru Gaur

Litterae Vasconicae-Euskeraren Iker Atalak aldizkariaren 18. zenbakia argitaratu barri dogu. Hizkuntza- eta literatura-gaien ganeko ikerketak zabaltzea helburu daukan aldizkari honetan, oingoan herri-literaturaren eta herri-hizkeraren ganeko artikuluak suertau dira danak.

Hasteko, Jesus Antonio Ciden “Raptores marinos en la balada europea: desde El Infante Arnaldos a Neska ontziratua” izeneko artikulua dator. Lan horretan, neska ontziratuaren motiboa hartu dau aztergaitzat, eta euskal baladetako testuetako edukiak munduan zeharreko beste batzukaz konparatu.

Jabier Kaltzakortak lan bi egin ditu ale honetarako. Lehenengoan, “Verso verriac Gabon gaberako” izenburuagaz, ahoz oso zabalduta dagoan Gabon-kanta baten arrastoan ibili eta gero, aldaera askoko kantuaren jatorriko bertsopaperera eroango gaitu.

Bigarrenean, “Croharé zapatariaren kantu-kaiera” izenekoan, zapatari horrek gordetako kantutegiko hogeta hamabi kantuak dakarz . Horrezaz gainera, banan-banan konparatu ditu beste ikertzaile batzuk egindako lanakaz. Gure herri-kantuen errepertorioa aberasteko material ezin hobea da.

Amaitzeko, Xabier Bovedak “Bitañoren Durangaldeko esaerak” izeneko bilduma dakar. Bitañok Izurtzako berbeta batu eban, bai berbak, bai esaerak, bai pasadizo eta antzekoak, argitaratzen joateko, baina asko eta asko inoiz agertu barik geratu ziran. Lan handi hori ondo-ondo aztertu, eta aukeraketa bat egin dau Xabierrek. Artikulu honetara ekarritako lagina ederra be ederra dogu, ahozko hizkeraren bizitasuna eta adierazkortasuna ikusteko aproposa.