Labayru Gaur

Irailaren 14an Valentzian Espainiako Eleizaren Agirizainen Alkarteak egindako XXXIII. Biltzarrean parte hartu dogu. Aurtengo batzarra “Eleizaren artxiboak eta ondarea” izenburuagaz egin da, eta bertan Labayruk ondare immaterialaz daukan artxiboa eta horregaz egiten dogun lanaren barri emon dogu.

Akaitze Kamiruagak eta Igone Etxebarriak prestautako aurkezpenean, Labayru noiz, zelan eta zertarako sortu zan azaltzeaz ganera, gaur egun Euskal Bibliotekan dagoan funtsaren barri emon dabe: liburuak, aldizkariak, kartelak, pegatinak, audioak, bideoak, argazkiak…

Artxibo hori, dana dala, ikerketaren pentsudan egiten da, haren osagarri eta lagungarri. Hari horretatik, ondareagaz lotuta egiten diran lanak azaldu dabez: gaiei eta herriei buruzko monografiak, unidade didaktikoak, ibilbideen ganeko bideoak… Helburua beti da batutako ondare hori gizarteratzea eta hurrengo belaunaldien eskuetan ipintea.