Kategoria: Literatura

‘Euskal literatura eta memoria’ jardunaldia

0
Argitaratze data: 2019-11-26 Kategoria: Barriak, Literatura

Sabino Arana Fundazioak eta Bilbao 700 Fundazioak alkar hartuta, “Euskal literatura eta memoria” izeneko jardunaldia eratu dabe azaroaren 20an Bilbon. Erakunde biok memoriaren ganean eratuten daben hirugarren saioa da.

Igone Etxebarria Labayru Fundaziokoa ibili da eratzen laguntzen, eta jardunaldian bertan aurkezle edo moderadore. (gehiago…)

Laura Urubururen “Katigatu ninduzun librea nintzena” liburuaren aurkezpena

0
Argitaratze data: 2019-10-14 Kategoria: Barriak, Literatura

Urriaren 10ean, iluntzeko 7.30ean, aurkeztu eban Laura Uruburu idazleak Katigatu ninduzun librea nintzena izeneko eleberria, bere jaioterrian, Gernikan, uriko Iñurrigorria izeneko liburudendan. Labayru Fundazioak argitaratua da liburu hau, Urbegi literatura sortan.

Ordubete inguruz jardun eban hogei bat lagunen aurrean (irakasle, kazetari, idazle eta beste) bere eleberriaren kanpo-barruak, azal-maminak puntuz putu garantzen. Hitzaldi ondo taiutu eta jositako baten, bizitasunez eta arintasunez zehaztu zituan obraren hainbat alderdi. (gehiago…)

Jabier Kaltzakorta ahozko ondarea zabaltzen

0
Argitaratze data: 2019-10-04 Kategoria: Barriak, Literatura

Urriaren 3an Jabier Kaltzakortak hitzaldia egin dau Durangoko Museo Historikoan, Ondarearen Europako Jardunaldien barruan.

Museoko goiko ganbarako aretoan hainbat lagun batu dira hitzaldira. Aurtengo gaiak “Ondarea plazara!” dauka izena, eta ospakizun, jai, eszenaratze moduan egiten diran jarduerei zuzenduta dago, beti taldea eta gizartea parte hartzaile dala egiten diran jarduerei.

Euskal baladak hartu ditu berbagai Jabierrek, ahozko transmisinoko literaturan genero berezia osotzen dabenak. Euskal baladetan 75 gai inguru ditu berak katalogauta eta gaika sailkatuta. Batzuk gure tradizinoan ez eze, Europako beste hainbat lurraldetan be zabal dabilz, antzeko gertaerak kontatzen dabezala.

Hitzaldian balada historikoak hartu ditu gaitzat, hain zuzen be, lokalenak diranak, gertaera zehatzei buruzkoak dira eta.

Idatz & Mintz aldizkariaren 66. zenbakia kalean

0
Argitaratze data: 2019-07-16 Kategoria: Barriak, Literatura

Idatz & Mintz literatur aldizkariaren 66. zenbakia argitaratu barri dogu. Hainbat motatako testuak batzen ditu ale honek be, aurrekoen antzera. Oraingoan azaleko irudia Enrique Morenterena da.

Narrazinoetan, Miren Agur Meaberen “Ametsen inbentarioa”, Lourdes Unzuetaren “Aske izan gura”, Juan Ramon Madariagaren “Lau urtaro daltoniko”, eta Inaxio López de Aranaren “Eutsi beheari!” idazlanak daukaguz.

Poesian, Eneko Urizarren “Poema barik ezin dut” izeneko sorta.

Sebastian Gartzia Trujillok “Juan Mari Lekuonaren eliz kantak” gaia aztertu dau, saio-artikuluan.

Jabier Kalzakortak bere arloari oratu deutso, hau da, ahozko literaturari, eta oraingoan “Baratzian zoin den eder aza eta Porru-landare edo Oi uda-lili polita kantua” aztertu dau, beti ohi dauen moduan, aldaera ezbardinak eta ezezagunak eskainiaz.

Xabier Bovedak, literatura unibersalari egiten deutsan tartean, oraingoan Juan Ramon Jimenez (1881-1958) idazlearen barri emon ez eze, haren testu hautu batzuk euskeraz emon ditu.

 

Labayru gaur

Bilatu

Saskia

Artxiboa

Kategoriak