maiatza 2018

0

Euskaraldia euskeraren herri eta erakunde guztien hizkuntza ohiturak  astintzeko jaio da. Labayru Fundazioa Euskalgintzako Erakunde Sustatzaileen Taldean lanean dabil, gure arloan ekimenean parte hartuko daben ahalik eta ahobizi  eta belarriprest gehien aktibetako asmoz, baita irribiziak be. Hori dala-ta, Gasteizen maiatzaren 31an egin dan aurkezpenean parte hartu dogu. (gehiago…)

0

Euskera ikasten dabenen omenezko ekitaldi lez hasi ziran literaturearen klasikoak irakurtzen. Aurten, hamaikagarren edizinoan, euskara batuaren 50. urteurrena eta Euskaltzaindiaren 100. urteurrena be gogoan euki gura dauz hamabi orduko irakurraldia antolatzen dauan Bilbo Zaharra euskaltegiak.

Bizkaiereari be keinu bat egingo deutso aurten ekimenak, eta Txomin Agirreren Kresala liburua da irakurriko daben obra. Labayru Fundazioak Ondarroako idazlearen obra klasiko horren edizino barriztua argitaratu eban 2004. urtean, eta gura duenak Labayru dendan erosi leike.

Ehunka izango dira bagilaren 7an Arriagako irakurraldian bat egingo daben euskerazaleak, eta Labayruko langile eta ikasleak be han egongo dira, Ondarroako idazle klasikoaren Kresala esku artean. Urteroko modura, Labayruk be ekarpena egin gura deutso ekimenari, euskereari eta literatureari.

0

Bilbao-Metropoli 30-ek uria etorkizunera begira jartzen dihardu beharren. Bai langileen barruko beharrean, bai kanpora begira egiten diran hartu-emon eta jardueretan, gaztelania eta euskera daukez lan-hizkuntzatzat, baina ez maila berean. Hori dala-ta, euskerearen erabilera normalizetako plana egitea erabagi dabe.

Horretarako, gure teknikari batek diagnostikoa egin eta horren araberako plan estrategikoa diseinatu behar dogu. Lan-ildoak zehaztu ezeze, aurtengo kudeaketa-plana be prestauko dogu.

 

0

Lauaxeta ikastolako ikasle talde bat etorri da Labayrura irakasle bigaz, Iban Auzokoa eta Aitor Pagaldaigaz. Lehenengo Batxillerreko ikasleak dira: Irati Celada, Jon Castillo, Amaia Etxebarria eta Maider Rioja. Aurten, eskolako lan modura, euskera ikasteko proiektua landu dabe. Hori dala-ta, lan-batzarra egin dogu material hori alkarregaz bideratu ahal izateko.

Bai egitasmoari bai alkarlanari interesgarri eretxita, aurrera egiteko asmoa hartu dogu, egitasmoari forma emon eta aterateko moduak aztertzeko.

Batzarraren ostean liburutegiko bisitea egin dogu. Ikasleak interes handiagaz ibili dira dokumentu mota guztiak ikusten.

0
Luis Manuel Peña. Argazkia: Miguel Sabino Díaz.

“Karrantza ezagutuz” izenburuagaz jardunaldia egin dabe Karrantzan maiatzaren 26an. Herriagaz zerikusia daukien gaiei buruz berba egiteaz ganera, El Pingano errotaren bisitaldia egin dabe. Programaren barruan, Luis Manuel Peñak hitzaldia egin dau Atlas Etnográfico de Vasconia programari buruz eta, zehatzago, nekazaritzaren ganean egin barri dan aleari buruz.

Hitzaldian egitasmoaren historia azaldu dau, eta egitasmoaren sortzailea, José Miguel de Barandiaran, Karrantzako Manuel López Gilegaz lotu dau; izan be, Barandiaranen ikaslea izan zan eta 1921etik hasita Anuario de Eusko Folklore aldizkarian lotuta agertzen dira.

Jardunaldian Sergio Gonzálezek be parte hartu dau, Apuntes de etnografía blogean parte hartzen dauenak, material grafikoagaz batez be. Miguel Sabino Díaz be hizlarien artean izan zan; hau be Etniker Bizkaia taldeko kidea eta blogeko kolaboradorea.

 

0
Jabier Kalzakorta eta Dabi Piedra.

Jabier Kalzakortak argitaratu barri dauen Euskal baladak: azterketa eta edizio kritikoa lana dala-ta, Bizkaie aldizkari digitalean alkarrizketa luzea egin deutso Dabi Piedra kazetariak. Bertan emoten ditu egileak hainbat jakingarri baladen generoari buruz eta lan-prozesuari buruz.

Irakurri alkarrizketa.

0

‘Eleketan’ programa kulturako gaiak modu ludikoan lantzeko tailerren multzoa da. Hiruhileko honetan hainbat emongo ditugu han eta hemen, eskolen eskariaren arabera.

Begoñazpi Ikastolan 11 tailer egingo doguz HH3n hasita eta DBH2raino. Izan be, ikastetxe honetan hiruhileko bakotxean lantzen da taller-sorta bat, eta aurten bigarren edizinoa dogu.

Beste alde batetik, Galdakaon hainbat ikastetxetan emongo ditugu HH3tik eta LH4ra bitarteko mailetan: Eguzkibegin 5 tailer, Unkinan 3 eta Gandasegin bat.

Gaiak era askotakoak dira: jolas eta lanbide tradizionalak, gure ingurua ezagutu, ospakizun jakinakaz zerikusia dabenak, memoria, ahozko hizkuntza eta kontalaritza, irrati-tailera, jatekoen ganekoak (taloa edo gaztaia egitea kasurako) eta abar. Tailer bakotxean jakingarriak azaltzen dira, eta horregaz batera jarduera ludiko bat egiten da. Bai edukia bai jarduerea adinari egokituta dagoz, eta gaiak eskolatik datorren eskaerearen arabera adosten dira.

Programa interesgarria da eta hazten doana, eskoletan ezeze, alkarte, liburutegi eta ostantzekoen bitartez be zabaldu daiteke eta.

0

Egunotan dohaintza bat hartu dogu gure Euskal Bibliotekan. José Antonio Aranburuk, Busturialdean eta Lea-Artibai inguruan Natxi ezizenagaz ezagunagoa danak, gure artxiboaren esku itxi dau 60 karteleko bilduma, Luis Angel Gainzaren bitartez. Bilduma horretan azken berrogei urteetako kartelak dagoz, gehien baten bertsolaritzagaz lotutakoak (bertso-saioak eta omenaldiak) eta herrietako jaietakoak. Batzuk inprentan aterata dagoz, eta baliteke beste nonbaiten kopiaren bat egotea, baina beste batzuk eskuz egindakoak dira, kopia bakarrekoak.

Kartel horreek katalogau, eskaneau eta gorde egingo dira Euskal Bibliotekak horretarako daukan fondoan. Honezkero 70.000 baino gehiago dira guztira.

0

Labayru Fundazioaren proiektuetariko bat, aurten, Gatikako Udalarentzako baserrien katalogoa sortzea izango da. Horretarako, hasteko, hainbat datu-base hustu doguz; besteak beste, Fogueraciones de Bizkaia del siglo XVIII liburua eta Bizkaiko Foru Agiritegi Historikoko 1825-1830ko Polizien Erroldak eta Archivo Municipal de Gatika. Horreen hustuketeari Udalaren zerrendea eta Eusko Jaurlaritzak daukan datu-basea gehitu jakoz.

Momentu honetan, jasotako informazinoa lekukoakaz kontrastetan gabilz. Grabazinoen bidez lekukoek baserriak izentetako ahoz erabilten dabezan formak lortuko doguz, sarritan idatzizkotik asko aldentzen direnak. Informanteei batutakoa be lagungarria izango da katalogoa osotzeko.

Argitalpenean, baserriei buruzko informazinoaz gainera, bakotxaren argazkia gehituko da.

0
Jabier Kalzakorta, Labayruko eta Deustuko lagunakaz.

Jabier Kalzakortak Euskal baladak: azterketa eta edizio kritikoa lana aurkeztu dau. Unibersidaderako egindako tesi-lana da berez, eta hor batu ditu orain arte ezagutzen diran balada eta balada-zati guztiak. Bere helburua jatorriko iturrietara jo eta testuak zehatz eta manipulau barik emotea izan da.

Antonio Zavala zanaren lorratzetik, 75 balada-gai landu ditu. Bere ekarpenik handienetakoa da ezezagun ziran aldaerak gehitzea beste biltzaile batzuek egindako bildumetara. Etxe, kamara, korta, liburutegi, biltegi eta era guztietako gordelekuetan ibili da Euskal Herri osoan holangoen bila, eta bai topau be harribitxi zoragarriak. Berak esan dauen moduan, makinatxu bat pausu egin ditu ezer topau barik, baina kanturen bat aurkitu orduan, orduan bai poza.

Ahoz lehenago kantatzen ziran, eta orain dala 30-40 urte batzen ziran baladak hondino. Gaur egun guztiz aldenduta dagoz memoriatik, kantari ezagunen bitartez ezagutzen ditugunak izan ezik.

Aurrerantzean erreferentziako lana izango da hau, euskal herri-literatura ezagutu edo landu gura dauen edozeinentzat.

Labayru Fundazioak argitaratu ditu liburukiok, BBK Fundazioaren eta Markinako Udalaren laguntzaz.