abendua 2018
Aurtengo Durangoko Azokan nobedade moduan Laura Urubururen nobela barria erakutsiko dau Labayru Fundazioak.
Amodio-kantu zahar baten kopla guztiz ezagun bat dau izenburutzat, Laura Uruburu Totorikaguena idazleak plazara dakarren elaberri barri honek: Katigatu ninduzun librea nintzena.
Labayru Fundazioak argitaratu dau, euskal narratibari eskainia dauen Urbegi sortan, bildumako hirugarren alea egiten dauela.
300 orrialde beteko elaberria da, zati nagusi bitan banatua, eta zati bakotzaren izenburutzat, euskal errefrau baten osagai bana dituela: Aurreak erakusten du / atzea zelan ibili. Narrazinoa zortzi kapitulutan atalkaturik dago, bakotxaren izenburutzat aste-egun jarraikoen izenak dituela: igandetik igandera.
Amodioa, elaberri honetan, ez da neska-mutil edo andra-gizonen artekoa, ama-semeen artekoa baino. Umetxo baten heriotzagaz hasten da istorioa, eta gertaera triste eta lazgarri horrek, amaren, Elba eleberriko protagonistaren bizitza erabat asaldarazten dau, eta bihotza eta emozinoen mundua astintzen deutsoz era bortitz baten. Noraezean ikusten dau bere burua herstura eta egonezinean; ahalmenik gabe modu galduan, zorigaitzezko zirrara eta hunkipenen ekatxean. (gehiago…)
Durangoko Liburu eta Disko Azokan urtean zehar Labayru Fundazioak argitaratu dituan liburu eta aldizkariak izango ditugu ikusgai eta salgai.
Literaturan, Jabier Kalzakortaren Euskal baladak liburu bikotxagaz batera, Bitañoren narrazinoak batzen dituena, Mugarrapetik kontu kontari izenburuagaz. Idatz & Mintz aldizkariaren 64. zenbakia, separata eta guzti, Marcel Schwoben Umeen gurutzada.
Jarein bilduman Jose Mari Rementeriak ondutako Euskerazko dotrinak izeneko liburua, katalogo antzera atondua.
Gurean zer berri? saileko bigarren aleak, etnografiako gai laburren bilduma dakar. Eta Euskerazaleak 50 urte 1967-2017 liburuan alkartearen berrogeta hamar urteko ibilbidearen laburpena jasoten da.
Bizkaierazko aditza. Hirugarrena euskera ikasten dabilzanentzako ariketa-liburua da, aurretik egindako beste biren jarraipen modura datorrena.
Jose Mari Irazola hil da, 80 urte dituala. Elorrion jaio, abadetzarako ikasketak egin eta abade emon dau bizitza osoa. Baina abadetza ez eze, beste zaletasun bat be euki dau, bizi osoan landu izan dauena: euskerea.
Derioko Udako Ikastaroa hasi zanean, hasiera-hasieratik parte hartu eban. Aditza irakasten eban, baita ikasliburuak prestau be, bizkaieratik hasi eta aditz-sistema batua irakasteko, eredu biak buztartu guran.
Euskera irakasle izan da bizitza profesionalean, Bilboko Hizkuntza Eskolan, erretiroa hartu arte. Han be hainbat ikas-material atondu ebazan: deklinabidea, joskerea, atzizkiak, aditza, testualtasuna… Gizon ikasia eta jantzia zan, euskerea bizi ebana.
Euskerea barru-barrutik urteten jakon, berbaldun ona. Haren sermoiak atsegin-argiak izaten ziran, edonok errez aituteko modukoak, euskaldunen belarrietan berez-berez sartzen ziranak.
Baina Labayrugaz barriro euki eban hartu-emona, etxea itxi behar ebala-ta, hutsituten hasi zanean, euskal gaiei buruzko liburuak Euskal Bibliotekarako emon ebazan. Euskal hizkuntza eta literaturako hainbat liburu, behar dan moduan enkuadernautakoak, batzuk lehenengo edizinoak, eta beste asko gatxak topetan, berak erositako garaian batez be.
Aurten be Berbagunean parte hartu dogu, Azkuna Zentroan, Bilboko Alondegian. Ekimen honen helburua da euskerea Bilbo erdi-erdira ateratea, euskera arean dakien guztiek parte hartuta. Bilbok euskerea behar dau, eta euskereak Bilbo esanda dago. Jarduera honen bitartez, euskerea Bilboko bihotzean agirian jarri gura da, eta Bilbo euskalduna erakutsi.
Urtero lez, aurten be gure ikasle-irakasleek parte hartu dabe, beste askoren artean. Aurten, ganera, Euskaraldian bete-betean gagozala, inoiz baino gehiago dator harira.
Hainbat lagunek osotu dabe hiztun multzoa, era guztietakoak: berezko euskaldunak, euskera ikasi dabenak, ikasten dabizanak, maite dabenak. Ariketea hizkuntza erabiltea baino ez da, bakotxak dakian heinean eta dakian moduan.
Bilbo-Abando
Colon de Larreategi, 14 – 2. esk.48001 Bilbo (Bizkaia)
Tel.: +34 94 443 76 84
labayru@labayru.eus
Derio
Larrauri, 1A - 5.a48160 Derio (Bizkaia)
Tel.: +34 94 406 01 71
idazkaritza@labayru.eus
Bilbo-Bolueta
Metroalde eraikinaBilbo-Galdakao errep., 6A
48004 Bilbo (Bizkaia)
Tel.: +34 94 607 72 10
labayru@labayru.eus
